Kai Gundari Senuan - Senuan I Bintang Meriah Si Ekonomis?

Gundari bagenda sangana musim pe la menentu, enggo sepatutna kita anak Bintang Meriah reh gigehna ku juma janah pe reh kreatifna ka min pe kujumanta. Adina kin selama enda ku juma gelah enggo mesai saja ngenca jumanta, e lanai main.

Gundari rata - rata anak Bintang Meriah enggo lit sekolahna gia SMA rata - rata. Ibas Bintang Meriah pe enggo seh teknologi internet. Adi i nin sekilas, labo min kita ketadingen kel ras anak kuta si lit ibas taneh Jawa enda. Banci ikataken la gia kita leben, silang - langna kita ngikuti denga. Tapi adi ibas kreatifitas, kita talu denga ras kalak Jawa. Per rajin ras per gigehna ku juma pe tading denga ka kita.Soal mbur tanehna, bali - bali nge, malah banci ka kukataken sekali, mburen denga ka taneh ibas kutanta Bintang Meriah asangken bas Jogja.

Cuma makana mesera denga lalap siakap ibas kuta, emekap perbahan dekahen senuan - senuanta la kena rega. Perban kai? Song song si suan me cina bas wari si la mejile, jadina hasilna la mejile, piah regana pe la mejile. Mon - mon, suan temanta cina, ikut ka kita nuan, piahna mbuesa ka cina si ndarat kutanta nari, piah la ka kena rega. Bagepe rimo, lit kalak bayak bas nuan rimo nari, mis ka kerina ka kita nuan rimo. Piah enggo mbuesa pe rimo bas Bintang Meriah. Hasilna la ka kena rega rimo ndai.

Jadi gua ngenda ninta ningen min. Ula kita min mis putus asa, sebab melala denga situhuna dalan. Em gunana gundari enggo lit internet ibas kutanta. Banci gelarna sieteh informasi terbaru, entah kin bas berita - berita bagi detik.com, kompas.com entah pe bas teman - temanta nari si tading ndauh bas kutanta nari.

Jadi adi sungkundu pendapatku, kai nge gundari senuan - senuan si mejile si banci nisuan janahpe ekonomis ia ibas Bintang Meriah? Maka adi nginget per burna taneh Bintang Meriah, makana situhuna kai pe banci nge suan si penting ula enteremsa nuan senuan - senuan si seri ia. Lit piga - piga si meherga ia bas kuta jogja enda, emekap: Cina Cur, Dawan, Galoh ras sidebanna. Batang kayu putih pe meherga ijenda.

Adi Cina Cur, nuansa pe nukah, ndayakenca pe nukah janah pe la man timan ngatak tasak. I jogja lakon cina cur si nguna denga entah pe si meratah. I jenda momon seh regana Rp. 60.000,- per kilo. Bage kape dawan. Adi dawan ise pe tengka, ntabeh ka. Jadi katawari e pe lako.

Gambar 1. Jamur Tiram

Adi lit ka peken si jarang si suani, padin suan i je, batang lulang, entah pe batang kayu putih. Adi lulang, teknari enggo merga perban lulang em niban jadi pengganti bensin. Adi kayu putih, melala ni buat minakna. Banci ka si suan batang Albasia, enda bahan dasar triplex. nukah nuansa 10 tahun enggo banci perani. Merga sebana mejile kayuna, pinter - pinter biasana. Banci ka pe nibahan jadi bahan bangunen entah pe kerajinan tangan.

 Gambar 2. Bibit Pohon Albasia

Endam ia piga - piga contoh si banci kuakap jadi komoditi anak Bintang Meriah. Jadi la perlu kita radu2 radu nuan cina entah pe rimo saja. Melala denga senuan - senuan si lit regana. Tading gundari apa siakap si cocokna.

Bujur.

Sejarah Bintang Meriah

Nina nini bulang, sope lenga nai lit kuta Bintang Meriah, ibas kuta Bintang Meriah enda melala kel tualah janah pe kayu - kayu sideban ibas kerangenna.

Kerangen enda nai seh kel mbur na janah pe melala binatang - binatang si nggeluh ije. Emakana ibas sada wari reh me kalak kaban ku kerangen enda. Asal kalak kaban enda aku pe labo jelas, tapi nina nini bulang mbarenda, kalak kaban enda asalna ibas kuta kenjahe nari nina. Jadi idapeti kalak kaban enda emekap mbue kel mencibut bas kerangen enda ndai.

Gambar 1. Mencibut/tupai

E ipasangna me kap alat guna nangkap mencibut e, gelar alat enda nina emekap "mentang". Mentang enda iban bas buluh belin nari, bentukna bagi moran tapi lit penjepitna arah gagang ne.

Ibas ia pesikap mentang na e, buah kayu ngenca lit datna umpanna. tapi bage kenca nggo pesikapna mentang na e, lenga lima menit pe mis idat na sada. Cubakenna ka sekali nari, cebuni ia nimaisa mencibut ndai. Bage kenca ia cebuni mis reh ka mencibut , janah misa ka idatna.

Rukur si kalak kaban enda, "Ih meriah kel ijenda ndai mentang ari. Pagi taku ajok temanku gelah mbue pagi banci baba kami." Piahna nggo karaben, mbue kel ulih si kalak kaban enda ndai si man babanna kurumahna.

Seh ia kutana, sungkuni kalak ia, "Ija ka dat ko mencibut ena ndai bagena buena?".

"Lit kap jah kerangen si seh kel buena mencibutna, tapi agak ndauh ia"

"Ija kin e, aku pagi sada!", nina temanna ngerana ndai.

"Banci nak, pagi ras ka kita kujah", nina kalak kaban. "Jumpa jabur dage pagi kita!"

Emaka pagina jumpa me kalakenda ndai duana ibas jambur. Ije nggo ka lit ka kalak sideban si medem ibas jambur e. "Eh, nggo ko reh nak? Ma enggo lah ko man ndai e? Eta dage kita berkat", nina kalak kaban.

"Kuja ka kin ate kena e?", nina kalak si medem bas jambur e ndai dingen pekenana cabin kampuhna. "Enda ka si kaban enda, dilo na ka aku ku kerangen ah", nina teman si kaban.

"Ija kin kerangen e o kaban?"

"Ah ndauh dah tapi ijah ndai meriah kel mentang mencibut", nina kaban enda ka.

"Ente kena dage yah, baba kari deba man bangku ya. Aku sangana ka mesui urim ku. Jadi sekali nari pagi aku ikut.", nina kalak si mbaru medak e ndai. Lawes me kalak kaban ras temanna ndai ku kerangen e.

Telu wari enggo dekahna la mulih si kaban ras temanna e. Tersungkun kerina anak kuta, kuja nge kalak kaban ras temanna e nina sapih sapih ia ije. Ituriken teman kaban (si medem bas jambur ndube) me man anak kuta.

"Nina kaban dua mberngih, ia lawes ku kerangen ndarami mencibut nina", nina teman kaban.

"Lalah nggo pan arimo kalak ndai? Ku kerangen siapai kin kalak ndai lawes? ", nina anak kuta sideban.

"Nina ku kerangen si meriah mentang ije", nina teman kaban ka.

I sulu sulu anak kuta me kalak kaban ran temanna e. Piahna jumpa me dungna bas kerangen si meriah akapna mentang mencibut e ije. Nggo ban kaban ndai me kap ije sapona man inganna medem ras temanna.

Kenca anak kuta seh ije, iban kalak kaban enda me pangan janah anak kuta ras kaban kerina man mencibut e ije.

Nina kalak kaban, "Aku ijenda teku erkuta, apai kena si merhat ijena erkuta, tading kena ijenda. Gelar kuta enda ateku kubahan Mentang Meriah".

Je nari me asal kuta Bintang Meriah, perbahan dilah kalak karo reh dekahna reh canggihna, piahna gelar Mentang Meriah nibahan jadi Bintang Meriah.

Bujur.